Zaate Herremenie Beejein Gesjraveld

Amie - 1997

  • Vergroot letter grootte
  • Standaard letter grootte
  • Verklein letter grootte

Over ons

E-mail Print PDF

Wie in 1955 c.v. De Sjlaaibök in Amie woorte opgeriech, voond de keersjveersje vereineging tot dao ouch meziek beej huurde. En dat zouw dan meziek môte zeen, dei neet allein beej karnevals, meh veural ouch beej De Sjlaaibök huurde. Beij herremenie Sint Walburga woorte get luij um raod gevraog. 

De vlam sjloog toen al gaw 'n groete voonk in de pan: d'r vörremde ziech 'ne groep van oongeveir 16 muzikante mèt 'n bezètting die mie es genoeg waor um karnevalsmeziek te sjpeule. D'r woord echter al direk meziek van niveau gevraog. Ummers, De Sjlaaibök hele eder jaor zittinge, ouch al in 1955. De oondertösse opgeriechde Hofkapel kraog es ierste opdrach um die zittinge van begin tot ind op te luustere. Ze hele de stumming in de aovend mèt aangepasde sjlagers, mèh oondersteunde ouch de optreijende artieste van eige bojem. Klapsjtök van dat muzikaal optreije waor 't speule van de eige Amiese vastenaovendssjlager, dei noe nog eder jaor door de luij van Amie gekoze weurt. In de karnevalsdaag zelf, van zaoterdagaovend tot aon asgoonsdag, inkluzief 't oettrèkke van de Raod van Èlf beij aander sezoensgelegenhede, begeleijdde de Hofkapel 't Hoeglöstig Prinsepaar en de Raod.

Dao waor 'n ederein zoe tevreije euver, tot vanaaf 1959 die taak zelfs woord oetgebreijd tot 't begeleije van kinderzitting en jeugkarneval. Jaorelangk bleef de bezètting van de Hofkapel naogenoeg 't zèllefde. Mèh in 1989 voonte versjeije ajd gedeende in de Hofkapel tot ze hun take mer 'ns môste doorgeve aan aander, jônger muzikante. Dao waore d'r oondertösse in de herremenie genoeg veur opgeleijd. In dat jaor kaom d'r dan ouch 'n groete verjônging in de Hofkapel. Waal waore d'r nog 'n paar van de beginjaore, die nog eve hun ervaring wouwe doorgeve aan de jeug, mèh dat bleek al gaw neet mie nudig. Vanaaf dee tied speule d'r in de kapel weer muzikante mèt väöl loch in de lônge en steit d'r 'ne muzikale leijer veur dei neet gaw meug in zien erm weurt es heer 'n oor aan ein sjtök de maot sjteit te houwe. Beej dat alles woord en weurt gein oondersjeid gemaak tösse man en vrouw: alletwie zeen in aantal en kwaliteit everedig vertegenwoordig. Nao 'n paar jaor voonte de kapellede tot de muzikale bezètting oetgebreijd moch weure.
Nuije meziek eis ummers ouch miejer instreminte, andere ammezuur, oetgebreijder bloos- en sjlaagwerrèk. D'r woord driftig in de buurt roondgekeke nao wie dat 't bèste opgelos kôs weure. Beej de plaatseleke korfbalclub leep 'n gelegenheidsherremenieke roond, dat al 'n paar jaor zien sjpore op karnevalsmaondag aan 't verdene waor.  
 

Kontakte woorte gaw gelag en de Hofkapel woord oetgebreijd mèt 'n aantal muzikante, boevaan sômmige al zier verdeenstelek sjpeilde en andere hun noete nog regelmaotig mèt kuns- en vleegwerreek beejein môste sjravele. Es kapel "Beejeingesjraveld" weurt vanaaf dat jaor regelmaotig opgetroje, mèt name beij bovegenumde karnevalsaktiviteite van De Sjlaaibök, mèh ouch op karnevalsdinsdag op 't Zaate herremeniekeskonkoer in Mestreech. Veur de begeleijing beij de zittinge is die bezètting aan de nogal te groete kant. Op ander gelegenhede laote veer oos es Hofkapel Beejein Gesjraveld boetegewoen binne en boete hure.